Ginpasuspende sang Land Transportation Office (LTO) ang penalidad batok sa paggamit sang temporaryo kag improvised nga plaka sang salakyan nga dapat untat magsugod sa Nobyembre.
Suno kay Assistant Secretary Markus Lacanilao, kinahanglan pa usisahon sang ahensya ang pila ka isyu antes magpatuman sang ₱5,000 nga multa.
Ginpahayag man niya nga indi angay nga pinahan ang mga motorista nga wala pa sang opisyal nga plaka bangud sang mga rason nga wala sa ila kontrol, pareho sang problema sa dealer ukon backlogs sang mga plaka sa LTO.
Ginpaathag ni Lacanilao nga bisan pa gin-suspende ang penalidad, kinahanglan gihapon sang awtorisasyon halin sa LTO antes magbiyahe ang salakyan nga wala pa plaka.
Gin-suspende man sang ahensya ang dealer policy nga dapat i-release ang plaka kag OR/CR sa amo man nga adlaw nga gin-turnover ang salakyan ukon motorsiklo.
Suno sa iya, maayo ang intensyon sang polisa pero indi praktikal, labi na sa mga lugar nga malayo kag indi dayon mahatag ang dokumento.
Sa bahin sang rehiyon, ginpahayag ni Atty. Gaudioso Geduspan II sang LTO Region VI nga mabudlay sa ila mag-confiscate sang temporaryo nga plaka tungod wala sang klaro nga awtorisasyon kag ang dokumento yara pa sa iban nga rehiyon.
May plano sila nga mag-meeting upod kay Asec. Lacanilao agod istoryahan ang mga isyu. Isa pa sa mga rason sang problema amo ang backlog sa plate number, kag bisan sa mga kabanwahanan, nagagamay ang naga-claim sang plaka.
Ginapanawagan sang LTO ang kooperasyon kag pagsunod sang tanan samtang gin-review pa ang mga polisa.
