Nagpaandam ang Department of Trade and Industry (DTI) sa mga manugbaligya nga nagahingalit sang sitwasyon sa idalom sang Enhanced Community Quarantine (ECQ) kag nagapasaka sa presyo sang mga balaklon.
Santo sa Price Act sa Pilipinas, ang mapamatud-an nga naga-engage sa illegal price manipulation ang dagdagan sang penalidad nga pagkapreso sang indi magnubo sa lima ka tuig kag indi magsobra sa 15 ka tuig kag multahan sang indi magnubo sa P5,000 kag indi magsobra sa P2 million.
Sa interview sang Bombo Radyo kay DTI- Iloilo Provincial Director Judith Degala, iya ginpahayag nga dapat i-report sang publiko kun may mga manugbaligya nga nagapagusto sa pagpataas sang bili sang mga basic necessities kag prime commodities.
Sa subong suno sa natungdan, wala sang na-monitor nga pagsaka sa presyo sa syudad kag probinsya sang Iloilo.
Sa bahin sang suplay, sandig sa monitoring sa 14 ka supermarkets kag 17 ka grocery stores sa Iloilo City, bastante pa ang prime commodities kag basic necessities para sa mga residente sang Iloilo sa sulod sang 2-3 ka bulan.
Apisar naka-ECQ ang syudad kag probinsya, wala sang price freeze ukon price control nga ipatuman.
