Ginkumpirma ni US President Donald Trump nga wala sang nakaluwas matapos nagbungguanay ang American Airlines regional jet kag ang US Army Black Hawk helicopter sa Washington, DC area sang nagligad nga gab-i.
Ini nga trahedya amo ang makamamatay nga air disaster sa Estados Unidos halin sang 2001 ukon sa sulod sang masobra duha ka dekada.
67 ang patay nga ginabug-usan sang 64 nga sakay sa passenger plane kag tatlo ka soldado nga amo naman ang sakay sang helicopter.
Antes ang alas nueve sang gab-i oras sa amo nga state, ang American Airlines Flight 5342 halin sa Wichita, Kansas ang nagahana na kuntani nga maghugpa apang nagbunggo sa helicopter sang Army rason nga nahulog sa Potomac River.
Ginkumpirma man sang mga opisyal nga “recovery effort” na subong ang ila ginahimo kag 28 ka mga bangkay pa lamang ang nakit-an.
Indi pa subong maathag ang rason sang collision apang nagapanguna na sa imbestigasyon ang National Transportation Safety Board.
Base sa mga eksperto, dapat nga anad na ang mga piloto nga yara sa passenger plane kag ang mga military pilot nga yara sa Black Hawk sa complex airspace nga ila agyan bangud magutok ang airspace sa capital region bangud tatlo gid ka commercial airports ang yara sa lugar magluwas pa sa major military facilities.
Kumpirmado man sang US Figure Skating nga lakip sa mga napatay amo ang mga miyembro sang figure skating community nga halin sa developmental camp sa Wichita. Lakip sa ginhingadlan amo sanday Evgenia Shishkova kag Vadim Naumov nga amo ang pares nga ginhingadlan nga world champions sang 1994.
