Ginpamatukan sang No to PUV Phaseout Coalition kag BAYAN Panay ang ginpatigayon nga Public Transport Modernization Convention sang Department of Transportation ukon DOTr kag World Bank sa Iloilo City sang Oktubre 13.
Sa interview sang Bombo Radyo kay Elmer Forro, lead convenor sang No to PUV Phaseout Coalition, iya ginpahayag nga wala nila ginasuportahan ang ginaduso nga programa nga may tinutuyo sa pag-phase out sang mga traditional jeepney.
Suno kay Forro, kabahin sa ila ginakabalak-an ang plano nga scrappage program kag pagtukod sang leasing company nga mahimo magresulta sa pagbag-o sang sistema sa ila pangabuhian sa transport sector.
Ginpahayag niya nga paagi sa ginaduso nga programa, mahimo nga ang mga driver mangin manug-arkila na lamang, samtang mahimo man nga madula ang kontrol sang mga kooperatiba sa ila operasyon.
Nagapati ang grupo nga ang amo nga polisiya mahimo magpabudlay sa mga jeepney driver kag operator, ilabi na ang nagapangabuhi sa magagmay nga sektor sang transportasyon.
Bangud sini, nagpatigayon sila sang protesta kag nagpresentar sang position paper agud ipahayag ang ila pagpamatok.
