ILOILO CITY – Nagpanawagan ang mga katapo sang No To PUV Phaseout Coalition sa Malacañang nga gilayon nga talupangdon ang pangabay sang mga senador nga isuspinde ang Public Utility Vehicle Modernization Program (PUVMP) nga ginatawag subong nga Public Transport Modernization Program (PTMP).
Sa interview sang Bombo Radyo Iloilo kay Mr. Elmer Forro, lead convenor sang No To PUV Phaseout Coalition, iya ginpahayag nga kumporme siya sa resolusyon bangud ang obserbasyon niya kag sang kalabanan amo nga hilaw pa ang programa kag ginpilit lang ang pagpatuman sini.
Suno kay Forro, kinahanglan anay nga suspindihon ang Modernization Program para maid-id nga matun-an sang maayo ang epekto sini.
Subong man, para matalupangdan ang kabalaka sang mga driver kag transport operators nga direkta nga maapektuhan sang pagpatuman sang programa.
Ginapamilit man ni Forro nga dapat pamatian ang sentimento sang mga apektado nga driver, grupo, unyon, kag transport cooperatives partikular na ang mga isyu nila sa konsolidasyon sa mga kooperatiba.
Nahibaluan nga solo lamang nga si Senator Risa Hontiveros ang wala nagpirma sa Senate Resolution 1096.
Ini nga resolusyon ang ginduso ni Senate Committee on Public Services Chairperson Senador Raffy Tulfo.
