𝗜𝗟𝗢𝗜𝗟𝗢 𝗖𝗜𝗧𝗬 — Magahiwat sang State of the People’s Address ang progresibo nga grupo sang No to PUV Phaseout Coalition Western Visayas kag Bagong Alyansang Makabayan buwas nga adlaw kadungan sang State of the Nation Address (SONA) ni Pres. Ferdinand Marcos, Jr.
Sa interview sang Bombo Radyo kay Elmer Forro, lead convenor sang No to PUV Phaseout Coalition Western Visayas, iya ginpahayag nga patigayunon ang kahiwatan sa atubang sang Iloilo Provincial Capitol kaupod ang nagkalain-lain nga sector, kon sa diin, indi lamang nahanungod sa transportasyon ang ila diskusyonan bangud luyag man nila mapalab-ot sa gobyerno ang problema sa multi-sectoral nga bahin sang pungsod.
Suno kay Forro, magasentro sa issue sa mga mangunguma, mamumugon, estudyante, kag mga pumuluyo ang pagapatpaton agud sukton ang administrasyon ni President Marcos.
Ginpahayag man sini nga ginabug-osan sang isa ka rally kag martsa ang aktibidad, kon sa diin, nagpasalig ini nga sila ang may permit halin sa city government agud nga legal nga makapatuman sang amo nga kahiwatan.
Ginpasigurado man sini nga indi sila makatuga sang huol sa trapiko bangud sundon nila ang mga pagsulundan sang syudad agud nga madinalag-on mapatigayon ang ila aktibidad.
Nahibaluan nga sang Hulyo 15, naglunsyar ang ila nga grupo sang State of Transport Address kon sa diin, ginhiwat ang isa ka rally sa atubang sang Iloilo Provincial Capitol agud nga ipabutyag ang ila nga pagkadismaya sa mga wala natuman nga promisa ni President Marcos.
