𝗜𝗟𝗢𝗜𝗟𝗢 𝗖𝗜𝗧𝗬 —Nagalaum ang No to Public Utility Vehicle Modernization Program (PUVMP) Coalition – Panay nga gilayon pirmahan ni President Ferdinand Marcos, Jr. ang mandato nga magasuspende sa transport modernization program sang gobyerno.
Ini kasunod man sang pagpirma sang 22 sa 24 ka mga senador sang resolusyon nga nagahingyo nga untaton anay ang implementasyon sang amo nga programa.
Sa interview sang Bombo Radyo kay Mr. Elmer Forro, Lead Convenor sang No to Public Utility Vehicle Modernization Program Coalition – Panay, iya ginpahayag nga ginalauman sang ila grupo nga mapirmahan ang ginaduso sang mga senador bangud nagapati ini nga indi handa ang pungsod sa modernisasyon sang transportasyon.
Suno kay Forro, tani pamatian ni Marcos ang panawagan sang mga senador bangud bug-os nga mga operators kag drivers ang suportado ang amo nga resolusyon.
Nagapati man ini nga ang kawsa sang pila ka mga lederes sang pungsod ang wala naga-reflect sa democratic interest sa mga myembro mismo sang mga kooperatiba bangud mahatagan sang kahigayunan nga tun-an ang ginapilit nga modernization program.
Ginpahayag man sang natungdan nga ang ginaduso nga transport break sang mga kooperatiba ang ‘self serving’ bangud sila lang man ang makabenepisyo nga yara sa kooperatiba.
Ginakabig man ni Forro nga ang tikang sang transport cooperatives ang isa ka economic sabotage bangud wala indi nagarepresentar sang kawsa sang mga pumuluyo.
Nahibaluan nga magapatuman ang transport break ang mga kooperatiba sang modernized jeepney sa syudad agud magprotesta sa resolusyon sang mga senador nga untaton ang modernisasyon.
