ILOILO CITY – Nagakadapat nga indi makatapak kag makalapas sang tawhanon nga kinamatarong ang plano nga ginapresenta ni Iloilo City Mayor Jerry Treรฑas nga magpaggwa sang Executive Order nga magamando sang ‘no vaccination, no work’ policy.
Sa interview sang Bombo Radyo kay Atty. Jonnie Dabuco, director sang Commission on Human Rights Region VI, iya ginpahayag nga bag-o magbalay sang EO ang alkalde, kinahanglan nga makonsidera man nga indi ini magresulta sa diskriminasyon sa mga empleyado sa syudad.
Importante man suno sa iya nga lantawon ang mga empleyado nga may health conditions kaangay sang allergy nga mahimo nga mangin upang sa pagpabakuna batok sa COVID-19.
Apang apisar sini suno sa natungdan, maayo man nga ginbuksan ini ni Mayor Treรฑas nga topiko agud madiskusyunan sang publiko kun sin-o ang mangin pabor ukon indi.
Ginpahayag naman sang Department of Labor and Employment (DOLE) 6 nga pabor sila sa COVID-19 Vaccination.
Sa interview sang Bombo Radyo kay Niezel Sabrido, spokesperson sang DOLE 6, iya ginpahayag nga pabor siya sa posibilidad nga ginbuksan ni Treรฑas agud mapatpat ang importansya sang pagpabakuna sang mga ginakabig nga frontliners nga mga empleyado sa syudad sang Iloilo.
Magluwas sini, nagakadapat suno sa iya nga makuhaan sang sentimento ang mga trabahador pinaagi sa pag-istoryahanay angot sa ‘no vaccination, no work’ policy.
Apang gintuad niya nga indi pa makabalay sang pinal nga panindugan ang DOLE bangud wala pa man sang kompleto kag pat-od nga EO nga ginpaggwa ang Iloilo City Government.
Nahibaluan nga ginkumpirma na ni Mayor Treรฑas ang advance payment sang syudad para sa ginbakal nga 600,000 COVID-19 vaccines nga magasakop sang 60 percent sang populasyon sang Iloilo City.
Ini nga mga bakuna ang nagikan sa British-Swedish multinational pharmaceutical kag biopharmaceutical company nga AstraZeneca nga ginalauman nga mag-abot sa syudad sang Iloilo sa bulan sang Hulyo.
