ILOILO CITY – Gin-athag ni Iloilo City Mayor Jerry Treñas nga indi magmato-mato ang Iloilo City Government sa pagpatuman sang ‘No Vaccine, No Work’ policy.
Ini ang kasunod sang nanuhay-tuhay nga reaksyon sang publiko matapos niya gin-anunsyo nga ginatun-an sang City Legal Office ang plano nga magpagwa sang executive order nga magamandu nga ang mga tawo lang nga may full vaccination batok sa Covid-19 ang sarang nga makabalik sa trabaho sa syudad.
Sa interview sang Bombo Radyo kay Treñas, iya ginpahayag nga ginahulat pa ang national policy bangud indi man mahimo nga lain-lain ang desisyon sang nanuhay-tuhay nga local government units.
Suno kay Treñas, hulaton gihapon ang desisyon nga posible magahalin sa Department of Health ukon sa National Inter-Agency Task Force.
Nagdepensa man ang alkalde nga gin-anunsyo lang ang amo nga plano ‘for public discussion’ ukon agud maistoryahan na sang publiko kun ano ang matabo sa mga business institutions samtang nagahilapit na ang mass vaccination program bangud ‘may yara gihapon sang mga nagaduha-duha nga magpabakuna’.
Kun matandaan, santo sa February 16 nga vaccine consent turnout sa syudad sang Iloilo, 29% lang sang kapin 10,000 ka respondents ang sugot nga magpabakuna batok sa Covid-19.
