ILOILO CITY- Wala nagasalalanto ang mando sang gobyerno nga ‘No Vaccine, No Ride Policy’ sa kun ano ang nasaad sa layi partikular ang Republic Act nga ginpirmahan ni Presidente Rodrigo Duterte.
Nasaad sa Section 12 sang R.A. No. 11525, nga ang COVID-19 vaccine cards ang indi mahimo kabigon bilang additional mandatory requirement para sa edukasyon, employment, kag iban nga kaangay nga government transaction purposes.
Sa interview sang Bombo Radyo kay Atty. Jonnie Dabuco, director sang CHR-6, iya ginpahayag nga dapat mahangpan sang publiko nga mas labaw ang Republic Act sa ano man nga memorandum circular sang Department of Transportation ukon sang ano man nga issuance sang National Inter-Agency Task Force.
Suno kay Dabuco, apisar nga may yara sang policy, mas gamhanan sa gihapon ang layi gani wala sang kinamatarung nga dapat masakripisyo bangud lang sa amo nga policy.
Pahayag pa sang CHR Director, kun ipamilit nga ipatuman ang nasambit nga policy, kalabanan sa mga magaantos amo ang mga pigado nga amo ang mayorya nga nagasakay sa Public Utility Vehicles kaangay sang jeep kag tricycle.
Dugang pa ni Dabuco,pananglitan nga dalukan sang driver sang PUV ang isa ka pasahero nga indi bakunado sang iya kinamatarung nga magsakay, mahimo mag-file sang kaso-kriminal ang amo nga pasahero batok sa driver ilabi na kun piliton ini nga magpanaog apisar nga nakasakay na ini sa jeep.
