ILOILO CITY – Wala sang may matabo nga water interruption sa syudad kag probinsya sang Iloilo.
Ini matapos man nga ginpatung-an nanday Iloilo Governor Arthur Defensor Jr. kag Iloilo City Mayor Jerry Treñas ang pagsinapol sa tunga sang Flo Water Resources Iloilo Inc. kag Metro Iloilo Water District (MIWD) kag Metro Pacific Water Inc. (MPIW)
Nahisugtan sa ginpatigayon nga pagsinapol sang duha ka parties nga padayunon sang Flo Water ang pag-supply sang tubig pagkatapos sang expiration sang contract subong nga adlaw, Mayo 15, 2022.
Ang nasambit nga agreement ang subject sa anum ka bulan nga duration kun sa diin, nagdangat sa P21.00 ang ginkasugtan nga balor sang tubig kada cubic meter.
Sa interview sang Bombo Radyo kay Iloilo City mayor Jerry P. Treñas, iya ginpahayag nga nalipay ini sa nangin resulta sang pagsinapol.
May yara sang nagakaigo nga tion ang duha ka partido agud nga hambalan ang terms sang ila nga kontrata.
Nahibaluan nga maapektuhan kuntani sang low pressure kag water interruption ang banwa sang Leganes, Barangay Pagsanga-an kag Anilao sa Pavia; distrito sang Jaro; La Paz kag Lapuz district.
