Kun bag-o pa lang ang relasyon, daw cute pa man siling sang iban ang pagselos-selos sa imo nga partner kay pagpakita lang ina kuno kun daw ano mo gid siya ka palangga.
Apang samtang nagadugay, madamo ang nagasiling nga makatalaka na ini ilabi na gid kun indi na makontrol kag nagapangimon na lang sa halos tanan nga tion.
Isa ka hitabo sa Argentina ang nag-ugat sa simple gid lamang nga selos kag naglab-ot sa isa ka krimen.
Isa ka adlaw, nagalakat-lakat kag naga-uyatay pa sang kamot ang 23-anyos nga lalaki nga si Mariano Grinspun kaupod ang iya 32-anyos nga nobya nga si Natacha Palavecino.
Samtang yara sa dalan, nasugata nila ang isa ka babaye kag ginbugno sini si Mariano bagud schoolmate gali niya ini sang una.
Nangamusta man lang ini, apang nangin bayolente na ang nobya ni Mariano tubtub nga gingabot sini ang iya dala nga kutsilyo kag gin-atake ang babaye nga nagpamugno nga si LC.
Natumba si LC sang naigu siya sang kutsilyo sa iya nga ilok, apang nalikawan na sini ang isa pa ka handos sang kutsilyo tubtub nga may nag-abot nga isa ka lalaki nga nagbulig sa iya kag nakaluwas siya sa krimen.
Sa pihak nga bahin, malas gid para kay Mariano bangud pagkatapos gin-atake sang nobya ang babaye, siya naman ang ginbalikid sini kag ginbuno sa dughan.
Base sa surveillance cameras sa area, nakabaisay pa ang magnobya antes nag-collapse si Mariano, kag sang ulihi, bisan haluson na ini makabangon, gin-atake pa gid ini sang iya nobya gamit lamang ang iya kaugalingon nga mga kamot.
Nagtawag man ang mga testigo sang emergency services apang ginbawian gid sang kabuhi ang lalaki.
Base sa nagapadayon nga imbestigasyon, nahibaluan nga may history gid man sang pagka-bayolente si Natacha.
Sang 2021, na-convict man ini kag napreso sang isa ka tuig sang ginbuno man sa dughan ang iya ex-boyfriend.
Mangin si Mariano ang una naman gali nga naka-report sa pulis bangud sa mga pamahog sang nobya kag physical injuries nga iya naangkon.
Sa pagkamatuod, sang Hulyo sang nagligad nga tuig, may restraining order nga gindagdag rason nga indi makapalapit si Natacha kay Mariano apang sang nag-expire ang order, didto man gali kag nagdesisyon si Mariano nga hatagan sang one more chance ang ila relasyon nga amo naman ang ulihi bangud sa trahedya nga natabo bangud lamang sa pagbugnuhanay sa dalan.#
