Pormal na nga napasaka ang qualified human trafficking charges batok kay anay presidential spokesperson Atty. Harry Roque.
Gin-file sang Department of Justice (DOJ) ang non-bailable nga kaso sa Angeles City Regional Trial Court (RTC) sa Pampanga kasunod sang ginaalegar nga involvement ni Roque sa gin-raid nga Philippine Offshore Gaming Operators (POGO) hub sa Porac sa amo man nga probinsya.
Lakip man sa ginkasuhan amo si Cassandra Ong kag 48 ka iban pa nga ginaalegar tag-iya, opisyal, kag nagapanguna nga mga empleyado sang Whirlwind mother company kag Lucky South 99 POGO.
Gin-akusaran sila nga nagapadalagan sang scam farm nga nagapang-traffic sang mga trabahador.
Suno sa piskalya, large-scale ini nga krimen nga ginhimo sang sindikato nga nahulog na sa Section 6 sang layi rason nga isa ini ka non-bailable offense.
Kinahanglan nga tumuron sang judge sa Angeles kun may yara sang probable cause nga mag-isyu sang arrest warrant batok kay Roque.
Pananglitan may warrant, pagpanghangkat ini sa Philippine government kun paano iserbe ilabi na bangud yara sa The Hague si Roque kag nag-apply para sa asylum bangud sa iya gina-claim nga “political persecution.”
Wala sang extradition treaty sa tunga sang Pilipinas kag The Netherlands.
Sa pihak nga bahin, ini naman ang una nga court charge batok kay Ong bangud wala ini malakip sa money laundering case nga gin-file sang DOJ batok kay dismissed mayor Alice Guo sa Bamban, Tarlac.#
