Nagtipon ang bantog nga mga artista kag ang mga abyan sang movie icon nga si Nora Aunor kadungan sang una nga gab-i sang iya haya sa Heritage Park sa Taguig.
Lakip sa yara sa misa nga ginpatigayon alas otso kagab-i amo sanday Jericho Rosales, Janine Gutierrez, singer nga si Imelda Papin, Ricky Lee, Nadia Montenegro, Coco Martin kag Julia Montes, kag iban pa nga dalagku nga pangalan sa showbiz industry.
Ginbutang man ang Philippine flag sa lungon sang aktres bilang parte sang pag-abi-abi kag pagdayaw sa iya bilang National Artist.
Naghatag man ang myembro sang Armed Forces of the Philippines (AFP) sang military salute sa Philippine cinema “superstar.:
Bukas sa publiko ang haya sang film icon sa Abril 19 kag 20 kag naka-schedule naman ang state funeral sa Abril 22, Martes. Ilubong ang 71-anyos nga beterana nga singer-actress sa Libingan ng mga Bayani bilang testamento sa iya legasiya bilang national treasure.
Ginbun-ag si “Ate Guy” bilang si Nora Cabaltera Villamayor sa Iriga City, Camarines Sur, kag nahingadlan nga National Artist for Film and Broadcast Arts sang 2022.
Pinaka-kilala siya sa iya iconic roles sa mga pelikula nga “Himala,” “Bona,”, “Minsa’y Isang Gamu-gamo”, “Bulaklak sa City Jail”, “The Flor Contemplacion Story”, “Tatlong Taong Walang Diyos”, kag iban pa. Lakip naman sa iya katapusan nga nangin proyekto amo ang “Mananambal” kag “Pieta”.
Magluwas sa pag-arte, kilala man siya sa pagkanta kag lakip sa iya bantog nga mga ambahanon amo ang “Pearly Shells” kag “Tiny Bubbles.”
Ginkasal siya anay sa aktor nga si Christopher de Leon sang 1975, apang sang ulihi nag-separar kag gin-annul ang kasal sang 1996. May yara sila sang biological child nga si Ian kag adopted children nga sanday Lotlot, Matet, Kiko, kag Kenneth.
