ILOILO CITY – Ginpahayag sang Olympic committees sang lima ka Nordic nations nga balabagan nila ang pagpahunugot sang Russian kag Belarusian athletes nga magpasakop sa 2024 Paris Olympics.
Sa joint statement sang Swedish, Norwegian, Danish, Finnish kag Icelandic committees, ang rason sang ila nga pagpamalabag amo ang padayon nga pagsakop sang Russia sa pungsod Ukraine.
Indi pa ini ang nagaka-igo nga tion agud nga magbalik ang mga ini base sa joint statement.
Nagpanindugan man ang mga ini nga padayon ang ila nga suporta sa Ukrainian people kag naga-demand sang kalinong.
Sang nagligad nga bulan, ginpahayag sang International Olympic Committee nga ginatun-an nila ang mga posibilidad nga pahanugutan ang mga athletes nagikan sa duha ka mga pungsod nga magpasakop sa Paris Olympics nga gilayon naman nga nag-ani sang kaakig.
Ginpahayag sang Ukraine nga i-boycott nila ang Paris Olympics nga ginsegundahan man sang Estonia.
Suno naman sa sports minister sang Poland, posible nga magadangat sa 40 ka mga pungsod ang magapamalabag sa tion nga magapasakop ang Russia kag ang kaalyado sini nga Belarusia.
Ginpahayag man ni Paris Mayor Anne Hidalgo nga balabagan man sini nga mag-compete ang Russia sa tion nga magpadayon ang inaway sa Ukraine.
