Nagpadala ang North Korea sang 3,000 ka dugang nga mga soldado sa Russia subong nga tuig agud ipakita ang ila suporta sa gyera sang Moscow sa Ukraine.
Ini nga report ang nagikan sa South Korean military nga ginpaguwa sa tunga sang balita nga ginahandaan naman ang pagbisita mismo ni North Korean leader Kim Jong Un sa teritoryo ni President Vladimir Putin.
Ang reinforcements nga ginapahayag ginpadala sang Enero kag Pebrero amo ang nagdugang sa 11,000 nga una naman nga gin-deploy sang North Korea sa Moscow suno sa South Korea Joint Chiefs of Staff.
Sa amo nga numero sang tropa, 4,000 ang napatay kag nasamaran sa away suno pa sa Seoul. Pahayag pa sang South, naggamit man ang Pyongyang sang madamo nga short-range ballistic missiles kag ginabanta 220 pieces sang 170-millimeter self-propelled howitzers kag 240-millimeter multiple rocket launchers. Base pa sa Seoul, posible pa nga magdaku ang kontribusyon sang North depende sa dalagan sang sitwasyon sa Ukraine.
Nahibaluan nga natalana naman nga magkitaay ang mga European leaders kag allies sa Paris, France agud nga diskusyunan ang gyera sa Ukraine kag agud nga malab-ot ang long-term stability sa rehiyon bangud wala pa sang kasiguruhan kun madayon ang ceasefire nga ginduso sang White House.
