ILOILO CITY – Gintawag nga iresponsable ni North Korean president Kim Jong Un ang mga opisyal nga amo ang nagadumala sang pandemic response sang pungsod.
Ginmandu-an na sang presidente ang katapo sang army nga magbulig sang paghatag sang bulong.
Nahibaluan nga nagdangat na sa masobra isa ka milyon ang mga tawo nga nagmalasakit nga gintumod sang Pyongyang bilang trangkaso apisar nga ginpa-idalom na sa lockdown ang pungsod agud nga maghina ang paglapta sang balatian sa mga wala nabakunahan nga populasyon.
Bangud sini, ginpakamalaot ni Kim ang mga healthcare officials ilabi na ang indi pagbukas sang mga pharmacies 24/7 agud nga mag-distirbute sang bulong.
Ginmanduan niya ang mga soldado nga magbalik sa trabaho kag gilayon nga i-stabilize ang suplay sang bulong sa Pyongyang kun sa diin, na-detect ang Omicron variant sang nagligad nga semana nga amo ang una nga kaso sang COVID-19 nga na-record sa North Korea.
Ginpamunuan ni Kim ang COVID-19 response sang pungsod lakip na ang emergency meeting sang political bureau angut sa outbreak nga ginakabig niya nga dako nga trouble sa pungsod.
Sa pinakaulihi nga report, nagdangat na sa 50 ang napatay, 1,213,550 ang nagabatyag sang trangkaso kag tunga sa milyon ang padayon nga ginabulong.
