ILOILO – Wala sang reported evacuees, damages, kag injuries sang ginpaidalom ang mga banwa sa Northern Iloilo sa Tropical cyclone warning signal Number 1 bangud sa nag-agi nga Bagyo Rolly.
Sa interview sang Bombo Radyo kay Dr. Jerry Bionat, pinuno sang Iloilo Provincial Disaster Risk Reduction and Management Office, iya ginpahayag nga apisar nangin maulanon, nangin hilway sa ano man nga halit ang Batad, Lemery, Sara, Concepcion, San Dionisio, Estancia, Balasan, kag Carles.
Wala man sang ginreport nga pagtaas sang lebel sang tubig ukon pag-awas sang tubig sa mga major river systems kag wala man sang narekord nga halit sa agrikultura.
Suno kay Bionat, may yara lang sang gin-evacuate nga isa ka pamilya sa Barangay Walang, Lambunao, Iloilo bangud nag-usmod ang duta sa kilid sang ila balay.
May namonitor nga paghulag sang duta sa Tubungan kag Maasin nga una na ginpahayag sang Mines and Geo-sciences Bureau (MGB) – Department of Environment and Natural Resources (DENR) Region VI nga lakip sa high-risk areas sa landslides kag flashfloods.
Ginapahayag nga lima ka pamilya ang gin-evacuate sa Barangay Inabasan, Maasin, Iloilo apang gilayon man nga ginpapauli kahapon sang hapon, Oktubre 1.
