Ginklaro sang Kamara nga wala nila ginakontra ang desisyon sang mga mahistrado sa Korte Suprema kundi ginahimo gid lamang nila ang ila nga obligasyon nga santo sa Konstitusyon.
Lakip ini sa ginplastar sang lower chamber sang nag-file na ini sang motion for reconsideration nga nagahingyo sa Korte Suprema nga baliskadon ang nauna nga desisyon sini nga unconstitutional ang articles of impeachment batok kay Vice President Sara Duterte.
Suno kay House Speaker Martin Romualdez, wala nila ginahangkat ang awtoridad sang korte, kundi tuyo gid lamang nila nga mapabilin ang kinamatarong sang Kamara bilang tingog sang pumuluyo sa proseso sang pagpasabat sa mga opisyal sang gobyerno.
“This is not an act of defiance. It is an act of duty,” kabahin sang deklarasyon sini.
“With full respect for the Constitution, in defense of institutional balance, and in the name of the Filipino people, the House of Representatives has filed a Motion for Reconsideration before the Supreme Court,” dugang niya.
“We do not challenge the authority of the Court. We seek only to preserve the rightful role of the House – the voice of the people – in the process of accountability,” pahayag pa ni Speaker Romualdez.
Kadungan sang pagpanindugan nga klaro sa Konstitusyon nga ang Kamara amo lang ang may eksklusibo nga kinamatarong sa pagpa-sugod sang impeachment, ginpahayag ni Romualdez nga ginsunod nila ang Konstitusyon kag ang mga nagliligad nga desisyon sang Korte Suprema sa ginpatigayon nga impeachment sang mga kongresista kay Duterte.
Sa ila nga apela sa Korte Suprema, ginpahayag ni Romualdez nga isa lang ka reklamo sang impeachment ang “initiated” batok kay Duterte, kag indi apat, kaangay sang ginahambal sa desisyon sang Korte Suprema.
Paathag sang Speaker, ginbutang lang sa archive ang tatlo ka una nga impeachment complaints sang napadala na sa Senado ang ikaapat nga reklamo nga pirmado sang 215 ka mga kongresista. Importante ini nga pagpasunod suno sa iya bangud nagapamatuod ini nga may isa lamang ka valid initiation kag indi apat.
“On February 5, 2025, the House transmitted the fourth impeachment complaint – filed and signed by 215 Members – to the Senate. Only after this transmittal did we archive the earlier three complaints. That sequence matters. It proves there was only one valid initiation, not four,” paathag sini sa iya video message.
“Even the Court’s own precedent – Francisco v. House – supports this: Only one impeachment can be initiated, and that initiation begins with a one-third endorsement or a referral. That is exactly what the House did,” dugang sang opisyal.
Gindugang pa sang lider sang Kamara nga wala sang nakasulat sa Konstitusyon nga kinahanglan pa pasabton anay si Duterte sa mga akusasyon batok sa iya antes ipadala sa Senado ang articles of impeachment.
Ang iya sabat kag panindugan batok sa mga akusasyon suno kay Romualdez ang dapat nga matabo na lang sa Senate trial bilang impeachment court, pareho sang natabo sa iban nga mga opisyal nga na-impeach na.
Kahapon, Agusto 4, sang gin-file sang Kamara ang motion for reconsideration paagi sa Office of Solicitor General nga amo ang nagatindog nga abogado sang lower chamber.#
