ILOILO CITY- Ginpanindugan sang isa ka abogado kag notary public nga nakit-an niya personal si dismissed Bamban, Tarlac Mayor Alice Guo sang nagligad nga Agusto 14 sa pihak san alegasyon nga nagbiya na ini sa pungsod sang nagligad pa nga bulan.
Suno kay Atty. Elmer Galicia, siya mismo ang nag-notarize sang counter-affidavit ni Alice Guo sang gab-i sang Agusto 14.
Base sa Supreme Court ruling sang 2018,ang isa ka notary public and indi dapat mag- notarize sang dokumento magluwas pa kun ang mga tawo nga nagpirma amo man ang mga tawo nga nag-execute kag personal nga nag-atubang sa iya agud mapamatud-an nga matuod ang kaundan sang kun ano man ang nasaad sa dokumento.
Pahayag ni Galicia, ginabanta alas-siete sang amo nga petsa, adlaw sang Mierkules, gin-refer si Guo sang isa ka kaupod niya nga may pangalan nga ‘Allan’, agud magpa-notaryo.
Suno kay Galicia, ang ginpakita ni Guo amo ang iya driver’s license bilang pamatuod sang iya identity.
Dugang niya, wala man niya ginsukot si Guo.
Ang law firm ni Galicia ang naka- base sa San Jose Del Monte, Bulacan, kun sa diin una na gin-report sang National Bureau of Investigation nga ila nakit-an si Guo.
Kasunod sini, ginpahayag ni Senador Sherwin Gatchalian nga kinahanglan imbitaron si Galicia sa masunod nga hearing sa Senado agud nga hatagan sang kaathagan ang nangin transaksyon sini sa dismissed mayor.
