𝗜𝗟𝗢𝗜𝗟𝗢 – Nabaton na sang Iloilo Provincial Health Office ang notice halin sa United States Agency for International Development (USAID) may kaangtanan sa temporary suspension sang tanan nila nga funded activities kasunod sang nangin direktiba ni US President Donald Trump.
Sa interview sang Bombo Radyo kay Dr. Maria Socorro Quiñon, Head sang Iloilo Provincial Health Office, iya ginpahayag nga on hold sa subong ang mga key initiatives sa idalom sang Support for Wide-scale Interventions to Find TB Project lakip na ang pag-hire sang dugang nga health personnel, pag-deploy sang mobile x-ray services kag pag-engage sa community Tuberculosis stakeholders.
Apang sa pihak sini, ginpasigurado ni Dr. Quiñon nga uninterrupted ang Tuberculosis program sa Iloilo bangud nangin kabahin na ini sa regular health programs sang Provincial Office kag mga local government units.
Suno sa iya, nagahatag man sang free mobile x-ray screenings ang Philippine Business for Social Progress (PBSP), sila man ang naga-train sa Tuberculosis service providers kag nagasuporta sa high quality Tuberculosis data reporting.
Nagpasalig man sang padayon nga bulig ang Philippine Coalition Against Tuberculosis kag ang Department of Health.
Pahayag sang natungdan, dako ang nangin kontribusyon sang USAID sa ikaayong lawas kag well-being sang Ilonggos ilabi na sa Universal Health Care, Family Planning kag Adolescent Health and Development pinaagi sa ReachHealth Project nga nag-umpisa sang 2023.
Nagalaum si Dr. Quiñon nga makonsidera sang US government kag mapahanugutan nga mapadayon ang pagpatuman sang mga life-saving projects sa Iloilo.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗟𝘆𝗻𝗱-𝗖 𝗝𝗼𝘆 𝗕𝗮𝗱𝗲
