ILOILO CITY – Dakop ang mga notorious nga motornapping suspects matapos gin-post sang mga ini sa online marketplace ang ila ginkawat nga motor sa Barangay Danao, Iloilo City Proper.
Ang tagreklamo amo si Job Misajon 39, residente sang Barangay Sinikway, Lapuz, Iloilo City.
Ang mga arestado naman amo sanday Joshua Corsino, 25, residente sang Barangay Badiangan Mina, Iloilo; Rommel Robles, 26, residente sang Barangay Canoan, Estancia, Iloilo; Ranjit Magay, 30, residente sang Barangay Hipodromo, Iloilo City Proper kag isa pa ka menor de edad.
Sa interview sang Bombo Radyo kay Police Captain Peter John Ramos, officer-in-chage sang Iloilo City Police Station No. 1, iya ginpahayag nga nagdangop sa ila opisina ang biktima matapos ginkawat ang iya motorsiklo sang gin-parking niya ini sa Iznart Street, sa Barangay Danao, Iloilo City Proper.
Suno kay Ramos, nakita mismo sang biktima ang iya motorsiklo nga naka-post na sa Online Marketplace.
Natumod naman sang biktima ang iya motorsiklo bangud sa iya temporary plate number.
Diri kag nagpatigayon sila sang follow-up operation sa plaza sang New Lucena, Iloilo kag una nga nadakpan si Corsino kag ang kahimbon sini nga isa ka menor de edad.
Ginbulgar naman ni Corsino nga ang kinawatan nga motorsiklo ang ginbaligya lang sa iya ni certain Rommel Robles sa balor nga P18,000.
Sa ginpatigayon nga follow up operation, nadakpan si Robles kag ang kaupod sini nga si Magay sa Barangay Villa Anita, Iloilo City Proper matapos gindaho sang mga ini ang peke nga Deed of Sale kag Certificate of Registration nga may pangalan nga Joshua Corcino.
Sa subong, preso na ang mga arestado magluwas lang sa menor de edad nga gindala sa Women and Children Protection Desk sa Iloilo City Police Station No. 1.
Nagapangatubang naman ang mga ini sang kaso nga paglapas sa Anti-Fencing Law ukon Presidential Decree No. 1612.
