ILOILO CITY–Gin-ako sang drug personality nga si Ryan “Arsap” Jablo nga nagapanumdom na ini kun paano malutsan ang iya kaso.
Ini matapos nga makuhaan siya sang bulto nga droga sa sulod sang iya balay sang ginserbehan sang search warrant sa rellocation site sa Brgy. San Isidro Jaro, Iloilo City.
Sa interview sang Bombo Radyo kay Jablo, ginpahayag sini nga natamad na ini nga maghatag sang kumento batok sa mga otoridad.
Gin-athag man ni Jablo nga ang manggad sini ang wala naghalin sa droga sa baylo bunga ini sang iya pinamalhasan nga negosyo.
Nahibaluan nga lakip sa mga utod sini nga drurugista amo sanday Rasty Jablo nga naghikog patay sa sulod sang presuhan sa General Santos City sang Nobyembre 22, 2017.
Napatay man ang isa sini ka utod nga si Carcar Jablo nga ginluthang sang riding in tandem sa Barangay Desamparados,Jaro, Iloilo City.
Si Rasty ang gina-angot sadto sa napatay nga drug lord ng si Richard Prevendido.
Matandaan nga nadakpan man sang damlag lang ang tiayon ni Rasty nga si anay Punong Barangay Noemi Jablo sang Desamparados , Jaro Iloilo City matapos mabaklan sang ginapahayag shabu nga ginbutang sa hasang sang bangrus sa Ungka 2, Pavia, Iloilo.
Si Punong Barangay Jablo ang high value target (HVT) sang PNP.
Una na nga nadakpan sa buybust operation ang isa pa gid ka utod sang mga Jablo nga si Carla Jablo-Ledesma sa Barangay Tanpael Tigbauan, Iloilo.
Samtang, nagahilibion nga nagapakitluoy ang iloy sang drug personality nga si Ryan “Arsap” Jablo sa mga otoridad nga indi pagpatyon ang iya anak.
Sa interview sang Bombo Radyo kay Nenita Jablo, iloy ni “Arsap” ginpahayag sini nga kuntani wala lang sang himuon nga malain ang mga pulis sa iya anak.
Suno sa iloy, makaluluoy man ang iya mga apo kun mapatay si “Arsap”.