ILOILO CITY–Nagapakig-angot na ang Iloilo City Police Office (ICPO) sa pamunuan sang West Visayas State University Medical Center (WVSU-MC) agud makagwa na sa hospital ang Fil-Pakistani nga si Hamza Pechon Kayani nga High Value target sang Philippine National Police (PNP).
Sa interview sang Bombo Radyo kay Police Superintedent Jonathan Pablito, hepe sang Police Station 1, ginpahayag sini nga ginpadal-an na sang health service doktor sang PNP si Kayani agud matumod ang kahimtangan sang ikaayong lawas sang notoryos nga Filipino-Pakistani.
Suno kay Pablito, indi madula ang posibilidad nga naga arte lang si Kayani.
Ginpaanggid man ni Pablito si Kayani sa fictional British Secret Service agent nga si James Bond nga madasig nga mag eskapo kag madasig nga maghulag.
Sa subong, naka hospital arrest si Kayani kag naka posas sa diin may mga pulis nga nagabantay sa iya.
Ini agud nga indi na masulit pa ang natabo sa Pendatun Police station sa General Santos City sa diin nakapalagyo si Kayani matapos ginpreso.