Nangin madinalagon ang operasyon sang Guimbal Municipal Police Station may kaangtanan sa pagdakop sa utok sa nagakatabo nga carnapping sang mga motorsiklo sa Iloilo.
Ang subject ang ginkilala kay Carlito Labanon, alyas Nene, 33 anyos sang Barangay Lupa-an Laua-an, Antique.
Sa interview sang Bombo Radyo kay Police Executive Master Sergeant Josenilio Sabran, iya ginpahayag nga natukiban nila sa pagtsekyar sang Closed Circuit Televevision (CCTV) footage sa nasambit nga banwa ang babayi nga nagapanguha sang mga motorsiklo.
Ila na desisyonan nga magpa-on sang motor agud nga madakpan sa akto ang nasambit nga subject.
Wala man napaslawan ang mga pulis kag nakit-an personal ang pag amat-amat kuha ni Labanon sang motorsiklo kag gilayon nga gindakop sang mga otoridad.
Sa pagpamangkot sang mga pulis sa subject, ila nahibaluan nga may kaupod pa si Labanon sa pag-carnap sang mga motorsiklo.
Suno kay Sabran, nagpatigayon sila sang hot pursuit operation sa Laua-an, Antique agud kuntani nga madakpan ang upod ni Labanon apang napaslawan sila nga madakpan ini.
Basco Francis
Sa ila nga pagpadulong sa lugar, ila natukiban ang 21 ka mga motorsiklo nga ginpang-carnap sang subject kag ginpangbaligya sa manubo lamang nga presyo.
Nagapangatubang naman sang kaso nga paglapas sa Republic Act 10883 ukon New Anti-Carnapping Act and Anti-Distracted Driving Act.
Nahibaluan nga narekober pa sa posisyon ni Labanon ang isa ka granada.
