ILOILO CITY- Napilitan nga mag-untat sa French Open ang Serbian defending champion nga si Novak Djokovic antes pa man ang iya quarter-final game bangud sa ginabatyag sini sa tuhod.
Naangkon niya ang injury sa iya fourth-round win batok sa Argentinian nga si Francisco Cerundolo.
Bangud sini, natapos na ang iya handom para sa iya record-extending 25th Grand Slam trophy kag magaresulta sa pagkadula sa iya sang iya world number one ranking.
Natalana kuntani nga atubangon ni Djokovic si Casper Ruud sang Norway sa quarter-finals apang napwersa nga mag-withdraw gikan sa Roland Garros tournament.
Bangud sini, ang runner-up sang nagligad nga tuig kag seventh seed nga si Ruud ang maga-abanse na sa semi-finals, kun sa diin possible niya atubangon ang fourth seed nga si Alexander Zverev sang Germany ukon ang 11th seed nga si Alex de Minaur sang Australia.
Ang injury ni Novak ang mahimo magbutang man sa iya sa alang-alang sa Wimbledon sa masunod nga bulan.
