Napaslawan ang Serbian superstar nga si Novak Djokovic nga makuha ang ika-25 na kuntani nga Grand Slam title matapos nakaangkon sang injury sa semifinal match sang Australian Open.
Nagahampang si Djokovic batok sa German kag world No. 2 nga si Alexander Zverev sa Melbourne sang na-angkon sini ang injury sa wala pa nga paa.
Sa una pa lamang, nakitaan na sang kabudlay ang hulag sang 24-time Grand Slam champion tubtub nga natapos ang first set paagi sa tiebreaker nga nalutos ini, 7-6. Naglawig ang una nga set sang isa ka oras kag 21 ka minutos.
Sunod nga nagkamustahanay ang duha ka player, nagguwa si Djokovic, nagapang-insulto ang iban nga mga tawo, samtang indi naman makapati si Zverev sa resulta samtang nagapungko ini sa bench.
Mismo si Zverev man ang ang nagsapubliko nga indi mapadayon sang Serbian tennis legend ang match bangud sa injury kag nagpahanumdom man sa fans nga indi ini dapat paghabuyan sang malain nga mga tinaga bangud sa iya nga sitwasyon.
Antes nag-abanse sa semifinals, nag-agi si Djokovic sa rematch sang finals sa Paris Olympics matapos sini naatubang sa four-set epic match ang Spanish star nga si Carlos Alcaraz. Sang amo nga quarterfinal match, may yara na nga daan sang medical timeout para sa Serb bangud sa upper leg injury.
Apisar 37-anyos na ang edad, wala ginadula sang Serbian ang posibilidad nga magbalik pa gid sa masunod nga tuig para sa grand slam tournament.
Ang pag-withdraw ni Djokovic nagkahulugan nga awtomatiko na nga nag-abanse si Zverev sa iya una nga career finals sa Australian Open kun sa diin maatubang sini si world number 1 Jannik Sinner.
