Bukas si Iloilo Third District Rep. Lorenz Defensor sa pagpadalagan sa pagka-gobernador ukon bisan sa pagka-senador sa masunod nga eleksyon.
Kasunod ini sang iya kadalag-an sa 2025 polls kun sa diin nagpabilin ini sa pwesto matapos nakakuha sang 194,791 votes — daku nga abanse sa iya kasumpong nga si Thelma Langusta nga may yara lamang sang 2,679 ka mga boto.
Bangud ini na ang iya ikatatlo kag katapusan nga termino bilang mamalidha, nagpahayag ang kongresista nga mas paayuhon pa sini ang iya serbisyo sa third district.
“Sa 2028, manami man kun makapadayon ako sa pagserbisyo sa mga Ilonggo sa iban nga paagi, kag bukas gid ako nga ma-prioritize ang development sang probinsya sang Iloilo,” suno kay Defensor sa interview sang Bombo Radyo.
Sa partikular nga pamangkot kun handa ini nga buslan ang iya magulang nga si reelected Governor Arthur ‘Toto’ Defensor, Jr., nagsabat ang manghod nga malayo pa ang 2028 apang wala niya ginadula ini nga posibilidad.
“Bukas kita sa tanan nga options subong. Sa national level, wala kita nakahibalo sang hulag, apang ginabuksan ko ang lawas ko sa tanan nga options para sa ikaayo sang mga Ilonggo,” pahayag sini.
Antes pa man ang 2025 elections, may mga naga-mensyonar naman sang pangalan sang kongresista bilang posible nga material sa senatorial race.
“Kun indi ka artista, komedyante, ukon action star, or incumbent senator, dapat may magpili anay sa imo nga mangin parte ka sang lineup [sa senatorial race], kay kun indi ka man lang pagpilion, indi na naton pag-usikan sang tyempo ang national nga eleksyon,” pahayag sini.
Gindugang sini nga wala man sang malain nga magsaot kag magkanta, apang nagalaum siya nga kun magpungko na ang mga indibidwal sa Senado, nahangpan man nila ang obligasyon sa legislation.
Martes, Mayo 13, sang nagpatigayon ang Provincial Board of Canvassers sang proclamation sang winners sa 2025 elections sa probinsya sang Iloilo.
Nanguna sa proklamasyon sang Commission on Elections – Iloilo Province si Provincial Election Supervisor Atty. Reinier Layson sa session hall sang Iloilo Provincial Capitol.
