TUBUNGAN, ILOILO – Ginatudlo sang New People’s Army nga ang grupo sang napatay pulis sa Tubungan, Iloilo ang nagluthang patay sa duha ka mga persona sa Barangay Mayang sa nasambit nga banwa.
Ang mga biktima amo sanday Glenn Bunda, 24 anyos Sangguniang Kabataan (SK) Chairman sang Barangay Tagpuan kag Harold Tablazon, 33 anyos, Barangay Kagawad sang Ago,Tubungan, Iloilo.
Sa interview sang Bombo Radyo kay Gebriela Tubongbanua, tagpamaba sang New People’s Army, iya ginpakigbahin ang statement sang ila nga grupo sa diin ang mga may salabton sa krimen amo ang mga kaupod sang ginpatay nga si PMSgt. Arnel Paurillo, 42 anyos, residente sang Bongol, San Vicente, Guimbal, kag assigned sa Iloilo Provincial Drug Enforcement Unit (PDEU).
Ang ginatumod nga kaupod ni Paurillo amo sanday;
-Police Major Gervinson G. Moyo- Pinuno sang Provincial Intelligence Bureau
-PSSg John A. Samiana
-PSSg Jovie Baconaje
-PSSg Joseph Setier
-PCpl Felfranz Lumahang
-Pat. Alkaid John Halanes kag;
-PCpl John Rico Nulada – Police Intel Non-Comissioned Officer sang Tubungan Municipal Police
Suno kay Tubongbanua, hugot nga nagapati ang ila grupo nga kabahin sang pagpanimalos ang ginhimo sang mga pulis bangud sa pagpatay kay Paurillo.
Indi naman makatilingalahan pahayag niya nga naandan na sang pulis kag militar nga dalahigon ang mga sibilyan.
Dugang pa sang natungdan, indi man makabig nga “full time” NPA si Harold Tablazon bangud nagatuon pa lang ini sang kabuhi bilang NPA sang naglisensya ini nga magbiya na sa grupo.
