ILOILO CITY – Hugot nga ginpanginwala sang New People’s Army (NPA) ang akusasyon sang mga otoridad nga ang grupo ang nagatago sa top drug lord sa Western Visayas nga si Richard Prevendido.
Sa ginpagwa nga official statement sang Coronacion Chiva “Waling-Waling” Command sang NPA-Panay, pinaagi sa ila tagpamaba nga si Julio Montana, gintawag nila nga black propaganda ang pagtudlo sang Police Regional Office (PRO), Philippine Army kag Philippine Drug Enforcement Agency (PDEA) sa ila nga protector ni Prevendido.
Ginpahayag sang NPA nga ginabasol sila sang administrasyon agud tabunan ang palpak nga kampanya batok sa iligal nga droga, paglapas sa tawhanon nga kinamatarong, pilit nga pagpatuman sang batas militar gamit ang histeria sang “anti terror” kag “anti-Moro”.
Ginapakamalaot man nila ang pagpagwa sang impormasyon sa media ni Iloilo Police Provincial Office (IPPO) director Senior Supt. Harold Tuzon nga ang NPA ang rason kun nga-a wala sa gihapon madakpan si Prevendido.
Gintawag naman nila nga malisyoso ang pahayag ni Lieutenant Colonel Vener Morga, commanding officer sang 82nd Infantry Battalion, sang Philippine Army matapos ginpahayag nga posible nagapanago si Prevendido sa 1st District sa Probinsya sang Iloilo.
Gin-akusaran naman sang NPA ang mga matag-as nga opisyal sang PNP nga amo ang matuod nga protektor ni Prevendido sa diin kahimbon sang mga ini ang Revolutionary Proletarian Army-Alex Boncayao Brigade (RPA-ABB).
Gin-athag sang NPA nga wala sila nagatago sa mga sindikato ukon mga kriminal bangud baliskad ini sa ila interes sa diin ginapakigbato sang mga ini ang interes sang publiko.
Ginpadayaw man sang NPA ang ila ginapatigayon nga kampanya batok sa iligal nga droga kag kontra sa sindikadto sa Western Visayas.
Pamatuod sini ang pagdis-arma sa grupo ni Darwin Celiz sa Cuartero, Capiz kag sa mga Longno sa Dumarao Capiz.
Sa pangkabilugan suno sa natungdan, kun wala sang mga protector nga opisyal sa AFP, PNP kag PDEA kag mga corrupt nga pulitiko, madugay na nga nadakpan si Prevendido.