ILOILO CITY – Ginsulod sang ginapahayag katapo sang New Peopples Army (NPA) ang Maasin Police Station sa probinsya sang Iloilo.
Sa interview sang Bombo Radyo kay 3rd District Board Member Manny Gallar nga natabuan sa banwa sang magsalakay ang rebelde nga grupo, ginabanta mas o menos 70 ka mga katapo sang NPA nga armado sang mga long firearms ang nagsulod sa istasyon sang police pasado las diyes kaina sang aga.
Ginapatihan nga planado ang pagsalakay sa diin may babayi nga una na nagpakuno-kuno nga magapalab-ot sang panumbongon sa police apang isa gali ka amazona nga nagahatag sang impormasyon sa kaupdanan sini.
Ginsundan ini sang pag-abot sang isa ka Elf Truck nga natabunan sang trapal sa atubang sang police station sa diin sakay gali diri ang madamu nga mga katapo sang armado nga grupo.
Ginpahayag naman sa Bombo Radyo ni Maasin Mayor Mar Malones nga base sa nakuha niya nga impormasyon, magluwas sa nagpakuno-kuno nga tagreklamo kag mga nakasakay sa truck, may yara pa gid sang mga naka-standby nga katapo sang grupo sa plaza amo man sa tindahan sa diin may ginpahamtang pa nga barikada ang mga ini agud indi dali masulod sang mga magaresponde ang istasyunan sang police.
Samtang sa interview sang Bombo Radyo sa hepe sang Maasin PNP nga si PSI Mark Cordero, gilayon gin dis-armahan sang mga NPA ang mga nakaduty nga police kag ginpangkuha man ang mga armas sa armory sang istasyunan.
Padayon pa ang inventory sang mga armas nga nakuha sang NPA kag amo man ang pag-ayam sa mga rebelde nga grupo nga ginapahayag padulong sa direksyon sang kabukiran sang banwa sang Alimodian.
Gindala sang mga rebelde ang isa ka Police Patrol Car sang Maasin PNP sa ila pagpalagyo.

RELATED ARTICLESMORE FROM AUTHOR