ILOILO – Subject for verification ang impormasyon nga may yara sang recruitment sang New People’s Army sa mga estudyante sa San Joaquin, Iloilo.
Sa interview sang Bombo Radyo kay Police Captain Robert Jason Tantia, officer-in-charge sang San Joaquin Municipal Police Station, iya ginpahayag nga nakabaton na sila sang impormasyon tuhoy sa recruitment sang rebelde nga grupo ilabi na sa mga Junior kag Senior High School student.
Suno kay Tantia, ang impormasyon ang ila na nga napalab-ot sa Iloilo Police Provincial Office kag Police Regional Office 6 nga amo naman ang nagapakig-angot sa Philippine Army.
Ginpahayag ni Tantia nga may mga lihok man sila agud nga indi madali nga maengganyo ang mga estduyante nga magsulod sa rebelde nga grupo.
Samtang, kumpirmado naman nga may yara sang presensya sang New People’s Army sa Tubungan, Iloilo.
Sa interview sang Bombo Radyo kay Police Executive Master Sergeant Lonelyn Talanillo, Police Non-Commissioned Officer in-charge sang Tubungan Municipal Police Station, iya ginpahayag nga may presensya sang Napoleon Tumagtang Command sang New People’s Army sa ila banwa apang ini ang subject for verification.
Suno kay Talanillo, kun recruitment naman sang rebelde nga grupo sa mga estudyante ang pagahambalan, wala sila sang may nabaton nga reklamo.
Sa pihak sini, ginpahayag ni Talanillo nga humalin pa sadto, todo-kampanya ang Philippine National Police agud nga engganyuhon ang mga estudyante nga indi magpakigbahin sa rebelde nga grupo.
