Ginklaro sang National Security Council (NSC) nga wala ini sang nakit-an nga pagpamahog nga maga-atake ang China sa Pilipinas.
Ini kasunod sang ginpaguwa nga statement sang presidential sister nga si Senator Imee Marcos nga may masobra 20 ka mga lugar sa pungsod nga potensyal nga iguon sang Chinese hypersonic missiles.
“The PH (Philippines) and PRC (People’s Republic of China) maintain cordial relations and are committed to managing whatever differences there may be. Thus, we see no threat of any imminent attack from the PRC,” kabahin sang statement ni Malaya.
Matandaan nga ginsiling sang senadora nga mahimo gamiton sang Beijing ang ila missiles kag mangin target sini ang 25 ka mga lugar bangud sang tikang sang Pilipinas nga aprubahan ang Enhanced Defense Cooperation Agreement (EDCA) sites ukon ang mga lugar kun sa diin may otoridad ang Estados Unidos sang Amerika nga magtago sang ila mga equipment kag mapakadala sang ila tropa.
Kun balikan, Pebrero 2023 sang gin-aprubahan ni President Marcos ang access sang Amerika sa apat ka dugang nga Philippine military camps nga amo ang Naval Base Camilo Osias sa Sta. Ana, Cagayan; Lal-lo Airport sa Lal-lo, Cagayan; Camp Melchor Dela Cruz sa Gamu, Isabela; kag Balabac Island sa Palawan.
Magluwas diri, may lima na nga daan ka EDCA locations ang yara sa Basa Air Base sa Pampanga, Fort Magsaysay sa Nueva Ecija, Lumbia Air Base sa Cagayan de Oro, Antonio Bautista Air Base sa Palawan, kag Mactan Benito Ebuen Air Base sa Cebu.
Sa statement naman ni NSC spokesperson Jonathan Malaya, nakasaad nga may “cordial relations” ang Republika sang Pilipinas kag ang People’s Republic of China kag committed ang duha ka nasyon nga i-manage kun ano man ang mga indi paghangpanay.
Ginsiling man sini nga may “substantial progress” sa mga tikang nga ginahimo agud mamanehar sang maayo ang sitwasyon sa West Philippine Sea.
Matandaan nga sa statement nga ginpaguwa ni Imee, ginsaad man sini ang tension sa West Philippine Sea kun sa diin masami ginabanggaan sang China Coast Guard ang resupply mission sang Pilipinas.
Ang pinakaulihi nga daku nga tension ang natabo sang tinalikdan nga Hunyo 17 kun sa diin isa pa ka Navy personnel ang nautdan sang tudlo; ginguba, ginguyod, kag ginbuslutan pa ang ila sakayan; kag ginpangkawat ang ila armas nga dal-on kuntani sa BRP Sierra Madre.
Sang Martes naman, may bilateral consultation mechanism na nga ginhimo ang China kag Pilipinas kun sa diin suno sa National Security Council, gin-pasalig sang duha ka pungsod nga hagan-haganon ang tension sa amo nga kadagatan.
Sa pihak sini, gin-athag sang council nga magapakig-angot ini sa presidential sister agud nga maklaruhan ang statement sini kag agud nga mapadalman ang ginatumod sini nga pamahog sa seguridad sang pungsod.
Nagpaiway naman ang Department of National Defense sa pagkomento bangud wala pa ini sang nakit-an nga basehan sa ginatumod ni Imee Marcos.
