ILOILO CITY – Padayon ang rollout sang facilitated subscriber identity module (SIM) registration nga ginpatigayon sang National Telecommunications Commission Region 6 sa mga probinsya sa Western Visayas.
Ini ang tikang nga ginahimo sang ahensya agud nga mas mangin accessible sa publiko ang pagpareshistro sang ila nga SIM cards.
Sa interview sang Bombo Radyo kay National Telecommunications Commission 6 Regional Director Engr. Leah Doromal, iya ginpahayaga nga magluwas sa Aklan kag Iloilo, magapadulong naman bwas nga adlaw, February 10, ang ahensya sa Antique para sa pag-assist sa mga subscribers.
Kaupod sang ahensya bwas sa Liberman Sports Complex sa Pandan, Antique amo ang Public Telecommunication Entities humalin las-otso sa aga tubtob las-singko sang hapon.
Suno kay Engr. Doromal, wala sang problema kun indi man taga-Pandan, Antique bangud ang pagparehistro sang SIM cards ang para man sa tanan.
Sa subong, ang ahensya ang nakapatigayon na sang facilitated registration sa tatlo ka mga lugar— Lemery kag Carles sa Iloilo kag Madalag sa Aklan.
Sa nasambit nga mga lugar, masobra 3,000 ka mga SIM cards ang narehistro kun sa diin, 983 sa Lemery, 1,003 sa Madalag, kag 991 sa Carles.
Nahibaluan nga tubtob lamang sa April 26, 2023 ang registration kag mahimo ma-extend sang indi maglapaw sa 120 ka adlaw depende sa Department of Information and Communications Technology.
Ang mga wala narehistro nga cards ang gilayon nga i-deactivate.
