Nagdepensa ang National Task Force to End Local Communist Armed Conflict (NTF-ELCAC) matapos ginkwestyon sang Commission on Audit (COA) ang ginapahayag wala sang basehan nga pag-transfer sang Technical Education and Skills Development Authority (TESDA) sang ₱160 million nga pondo para sa pagpatuman sang anti-insurgency programs.
Ginlaslasan sang COA ang TESDA bangud makabig nga wala sang nagakaigo nga guidelines ang ila pagpagwa sang pondo sa diin wala man napahat-pahat sang maayo kun sa para sa diin makadto ang kwarta.
Nahibaluan nga nasaad sa Section 9 sang Executive Order No. 70 nga ang mga aktibidad sang NTF-ELCAC ang wala ginasakupan sang pondo nga ginpain para sa mga proyekto sang TESDA.
Sa interview sang Bombo Radyo kay Jeffrey Celiz, spokesperson sang NTF-ELCAC, iya ginpahayag nga kabahin sang proyekto sang TESDA ang pagpatigayon sang skills and livelihood programs para sa mga former rebel ukon mga rebelde nga nagbalik sa sabak sang gobyerno.
Gin-athag ni Celiz nga wala nagakapyot ang NTF-ELCAC sang pondo halin sa TESDA bangud sa mga proyekto mismo nagadiretso ang kwarta.
Suno sa iya, ang TESDA man mismo ang naga-implemtar sang mga proyekto nga naangot sa NTF-ELCAC.
