Tubtub sa Martes, Oktubre 12, gid lamang ang tyansa sang mga political aspirants nga maka-file sang petisyon kun makit-an nga nagapasabad-sabad lang ukon makabig nga nuisance candidate ang isa ka indibidwal nga magapadalagan man sa eleksyon.
Sa interview sang Bombo Radyo kay Mr. Jonathan Sayno, election assistant sa Iloilo City – Comelec, iya ginpahayag nga ang pag-file sang petition batok sa isa ka political aspirant ang mahimo lamang sang isa man ka political aspirant nga nagapadalagan sa kaangay nga posisyon.
Posible mag-qualify bilang nuisance candidate ang isa kun nag-file ini sang certificate of candidacy agud himuon lamang nga kaladlawan ang election system ukon kun ginapatalang sini ang publiko.
Kun ma-identify ang isa bilang potential nuisance candidate, may oportunidad man ini nga depensahan ang iya nga kandidatura paagi sa isa ka hearing.
Sa idalom sang Comelec rules, ang commission ang pwede nga maka-file sang motu proprio cases agud madeklarar ang kandidato bilang nuisance candidate.
Ang pag-file sang petition ang pwede nga mahimo sang personal ukon pwede man nga ipadala sa authorized representative, within five days halin sa katapusan nga adlaw sang filing sang COC.
