ILOILO CITY – Wala nakapugong ang Coronavirus Disease 2019 (COVID-19) threat sa mga deboto nga magsimba sa Jaro Metropolitan Cathedral kaina sang aga.
Indi kaangay sa kinaandan, wala napuno ang simbahan apang ang kada isa ang nagasunod sa precautionary measures kasubong sang pagsuksok sang facemask kag pagsunod sa social distancing.
Mismo si Msgr. Meliton Oso, director sang Jaro Archodiocesan Social Action Center ang nagpanguna sa 6:30 am nga misa nga nabatian exclusive live sa Bombo Radyo Iloilo.
Ginpahayag ni Msgr. Oso nga halos katunga sang numero sang mga deboto ang wala nakatambong sa misa bangud sa kahangawa nga malatnan sang virus.
Suno kay Msgr. Oso, isa sa mga positibo nga kahulugan sang paggamay sang numero sang mga sumilimba amo nga ang iban ang nagpabilin sa ila balay kag nagpamati sa misa paagi sa radyo ukon sa online streaming.
Ginpahayag ni Msgr. Oso nga importante sa subong nga sundon ang preventive measures agud nga indi na maglala ang krisis sa pungsod.
Mahimo nga buwas, Lunes, makapaguwa na sang official statement ang Simbahang Katolika tuhoy sa pagpatigayon sang balaan nga aktibidad.
