USA – Mas nagtaas sa subong ang numero sang early voters sa Estados Unidos may kaangtanan sa Presidential elections nga patigayunon sa Nobyembre 3.
Suno kay Bombo International Correspondent Pinoy Gonzales, naglab-ot na sa masobra 60 million ang early voters kun sa diin kalabanan diri ang bag-o nga mga botante.
Ginpahayag ni Gonzales nga nagapakita lamang ini kun daw ano ang kalangkag sang mga Amerikano kun sin-o ang madaog sa tunga nanday US President Donald Trump sang Republican party kag anay Vice President Joe Biden sang Demoratic party.
Kadungan sang early voting, masako man ang pustahanay ilabi na sa Las Vegas kun sin-o ang magadaug sa pagka Presidente.
Ang away sang duha ka partido suno kay Gonzales ang mainit nga topiko sa Estados Unidos rason nga ginabantayan gid sang tanan ang mangin resulta sang eleksyon.
Apisar nga nagapanguna si Biden sa early survey apang indi ini garantiya nga siya na ang magadaug bangud sang nakaligad nga eleksyon, abanse man ang kandidato sang Democratic Party nga si Hillary Clinton apang si Trump man sa gihapon ang nagdaug sa adlaw sang eleksyon.
