ILOILO – Indi anay pagpabalikon sa trabaho ang pila ka mga empleyado sang Iloilo Provincial Capitol bilang kabahin sang precautionary measure.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga lakip sa mga dumili-an sa pagbalik sa trabaho umpisa, subong nga adlaw, Agosto 5, amo ang mga nalakip sa Low tubtub High Risk.
Magluwas diri, kinahanglan man nga mag work-from-home ang mga empleyado nga senior citizens lakip na ang mga may yara sang health condition bangud nga madali sila nga malatnan sang COVID-19.
Ginpahayag ni Defensor nga umpisa subong, limitahan lang anay ang mga empleyado nga maga-duty sa kapitolyo kasunod sang pagpositibo sa COVID-19 sang isa ka job hire sang General Services Office.
May kaangtanan naman sa hingyo sang Department of Health nga magpadala sang 20 ka doktor kag nurse bilang augmentation force sa Metro Manila, ginpahayag ni Defensor nga wala pa niya mabaton ang official communication gikan sa nasambit nga ahensya.
Sa pagpaathag ni Defensor, mahimo nga istoryahan sa patigayunon nga Disaster Cluster Meeting ang tuhoy sa hingyo sang Department of Health agud mahibalu-an kun mahimo nga makapadala sang medical experts ang Iloilo.
May kaangtanan naman sa sitwasyon sang mga Locally Stranded Individuals sa Metro Manila nga luyag magpauli sa Iloilo, ginpahayag sang gobernador nga ang national government kun tani ang magapangita sang paagi kun paano makahatag sang bulig.
Indi mahinago suno sa natungdan nga limitado lamang ang resources sang Local Government Unit kag limitado man ang hulag ilabi na sa mga lugar nga ginakabig high risk sa COVID-19.
Sa pagkamatuod suno kay Defensor, ang mga Local Government Units na kun kaisa ang direkta nga nagapakig-angot sa tagsa ka airline kag shipping company agud nga makapatigayon sang special flight ukon voyage agud nga makapauli ang mga Locally Stranded Individuals.
