ILOILO – Kulang ang mga health professional sa tagsa ka Rural Health Unit ipanggid sa populasyon sa probinsya sang Iloilo.
Ini ang nakita nga rason ni Dr. Patricia Grace Trabado, Provincial Health Officer, nga rason kun nga-a nagadamu ang mga pasyente sa tagsa ka district hospital.
Sa interview sang Bombo Radyo kay Trabado, iya ginpahayag nga may yara sang standard number nga dapat sundon santo sa nakasaad sa Local Government Code nga ginpatuman sadtong 1991.
Suno kay Trabado, ang standard ratio sang doktor sa populasyon amo ang 1:20,000.
Sa bahin naman sang midwife, ang standard ratio amo ang 1:5,000.
Ginpahayag ni Trabado nga nakadepende na sa tagsa ka Local Government Unit (LGU) ang pagbaton sang mga medical staff sa tagsa ka Rural Health Unit santo sa populasyon sang banwa.
Isa man sa pagpanghangkat suno sa natungdan amo nga ang mga medical professional ang nagapamalibad nga magtrabaho sa mga Rural Health Unit ilabi na sa mga malayo nga lugar.
