ILOILO CITY – Nagdangat na sa pito tanan ka mga Russian generals ang nagkalamatay kag isa ang ginpahalin sa pwesto sa tunga sang padayon nga kinagamo sa Ukraine.
Ang pinakaulihi nga napatay amo si Lieutenant General Yakov Rezanstev, commander sang 49th Combined Arms Army.
Samtang, ginsipa naman sa pwesto si Russian Army Commander General Vlaislav Yershov sang 6th Combined Arms Army.
Suno sa Western Officials, ginsipa sa pwesto si Yershov bangud sang dako nga kalutusan sang Russia kag indi asud-asud nga strategic failures sa isa na ka bulan nga pagsakop sang Russia sa Ukraine.
Ang iban pa nga general nga napatay amo si General Magomed Tushaev sang Chechen Special Forces.
Ang kamatayon sang madamo nga rank-and-file Russian troops kag senior officers ang nagkibot sa Western military kag security officials.
Suno sa report, indi maayo ang communication kag logistics system nga nagtulod sa mga senior officers nga maggamit sang unencrypted channels nga nagbutang sa ila sa alang-alang.
Suno sa Kremlin, nagdangat na sa masobra 1,300 military personnel ang napatay sa kinagamo apang santo sa record sang Western capitals, apat tubtob lima ka pilo nga mas mataas ini.
Nagapati ang mga opisyal nga 20 sa 115-120 ka battalion tactical groups sang Moscow ang indi na makasarang nga mag-away.
Ang commander naman sang 37th Motor Rifle Brigade sang Russia ang ginpatay sang iya kaugalingon nga tropa bangud sang sunud-sunod nga kapyerdehan.
Ginpahayag dugang sang Western official nga ang mag Russian troops sa Ukraine ang naga-antos kag nagaka-low morale.
