Nagdangat na sa 95 ka mga tawo ang nagkalamatay sa Espanya bangud sa pag-inulan kag pagbaha.
Sa Valencia nga amo ang pinakaapektado nga rehiyon, 92 ka tawo ang ginbawian sang kabuhi suno kay Angel Victor Torres nga amo ang minister of territorial policy and democratic memory sa Espanya.
Duha naman ang napatay sa Castile-La-Mancha samtang isa ang casualty sa Andalusia.
May gindeklarar man si Prime Minister Pedro Sanchez nga three days of mourning matapos nga natabo ang kalamidad nga talagsa lang gid ma-eksperyensyahan sa amo nga pungsod sa Europa.
Nagbubo ang mamunog nga ulan kag nangin mabaskog ang hangin sa Spain halin sang pagsugod sang semana matapos nagporma ang isa ka bagyo sa Mediterranean Sea nga rason sang pagbinaha sa eastern Valencia kag southern Andalusia regions.
Ini nga death toll amo man ang pinakamalala sa Europa halin sang 2021 kun pagbaha ang pagahambalan.
Pila ka mga lokasyon sa southern kag eastern Spain ang ginbubuan gid sang tubtub sa 12 pulgada nga ulan sa sulod lamang sang pila ka oras sang Martes nga amo ang ginakabig nga pinaka-malala nga na-eksperyensyahan sa Valencia sa sulod sang 28 ka tuig suno sa state weather agency nga AEMET.
Sa subong may yara na sang courthouse nga ginhimo nga temporary morgue sa regional capital suno sa local authorities samtang ginakahangaw-an nga labi magsaka ang numero sang patay.
Sunod-sunod man ang pagpakig-unong halin sa kaiping nga mga pungsod sa Europa kaangay sang Portugal, Germany, Italy, kag Ukraine.#
