Padayon pa nga nagasaka ang numero sang patay kag pilason sa natabo nga pagpamomba sa guwa sang Hamid Karzai International Airport kag saguwa sang isa ka hotel sa Kabul, Afghanistan.
Duha ka explosions ang natabo malapit sa Abbey Gate — ang ginagamit para sa evacuations sa Kabul airport. Ang isa ka paglupok ang natabo malapit sa Baron Hotel, ang gingamit bilang staging port sang Western nations para sa evacuations.
Suno sa US official, ang numero sang mga napatay ang ginalakipan sang mga kababainhan kag mga kabataan.
Nagapati ang US official nga ang natabo nga complex attack sa guwa sang Kabul Airport ang kahimo-an sang Islamic State group.
Suno sa opisyal, may yara sang mga myembro sang US military nga pilason lakip na ang duha ka mga suicide bombers kag ang gunmen.
Ang Islamic State Group ang mas radical kun ipaanggid sa Taliban kag nagapatigayon pa ang mga ini sang pagpang-atake sa diin target nila ang mga sibilyan.
Una na nga nagpanawagan ang Estados Unidos sa mga tawo nga nagatinguha nga makasulod sa Kabul airport nga maghalin na sa area bangud nagpaandam ang British kag Australian governments nga may yara sang “high threat” sang “terrorist attack” nga matabo.
Ginabanta masobra 10,000 ka tawo ang yara sa Kabul airport , nagahulat nga ma-evacuate gikan sa Afghanistan.
Matandaan ang deadline sang withdrawal sang US forces ang natalana na sa Agosto 31.
