Wala na nakibot pa ang National Union of Peoples’ Lawyers sa desisyon ni President Ferdinand ‘Bongbong’ Marcos Jr. nga indi magpasakop liwat ang Pilipinas sa International Criminal Court (ICC).
Sa interview sang Bombo Radyo sa Peoples’ Lawyer nga si Atty. Jobert Pahilga, iya ginpahayag nga kaalyado ni Marcos si anay Presidente Rodrigo Duterte nga isa man sa mga ginalantaw nila nga rason sa indi sini pagpasakop sa ICC.
Nahibaluan nga ang abyan kag kaalyado ni Presidente Marcos nga si Vice President Sara Duterte-Carpio ang anak ni anay Presidente Duterte.
Suno kay Pahilga, kilala man ang pamilya Marcos nga indi prayoridad ukon ‘least’ sang ila concern ang human rights ukon pag-apin sa tawhanon nga kinamatarong.
Paathag ni Pahilga, ang desisyon ni Marcos nga indi magpasakop sa ICC ang magaresulta sa indi pagpahilabot sang nasambit nga intergovernmental organization sa tanan nga mga crime against humanity nga posible malapas sa administrasyon sini.
Apang ang paglapas sa tawhanon nga kinamatarong nga nakomiter sa tion sang drug war ni Presidente Duterte ang imbestigaran sa gihapon sang ICC.
Matandan nga naghingyo si ICC Prosecutor Karim Khan sa mga hukom sang pre-trial chamber nga padayunon ang imbestigasyon batok sa kontrobersyal nga war on drugs nga gin-umpisahan sang anay Duterte administration.
Nag-upod ang Pilipinas sa sini nga treaty sang tuig 2011, apang nagmandu si former president Duterte nga mag-withdraw ang pungsod matapos nag-initiate ang ICC nga imbestigaran ang ginapahayag extrajudicial killings nga nagakatabo sa pungsod bangud sa war on drugs.
Suno naman kay Marcos, may lokal man nga imbestigasyon diri sa Pilipinas gani ginakwestyon niya kun ngaa nga kinahanglan pa nga mag-imbestigar man ang international court.
Ginpahayag man ni Marcos nga ginmanduan niya ang Cabinet Members nga tun-an sang maayo kag maghimo sang nagakaigu nga tikang agud nga malikawan nga ma-misinterpret ini sang ICC.
