Arestado ang isa ka lalaki matapos madakpan sa entrapment operation sang Criminal Investigation and Detection Group (CIDG)- Iloilo Provincial Field Unit sa Barangay Apologista, Sara, Iloilo.
Ang lalaki amo si Alyas Jan, 36-anyos, kasado, isa ka nurse kag residente sang Barangay Poblacion, Concepcion, Iloilo kag ang tagreklamo amo si Alyas Angel, 36-anyos kasado kag residente sang Jaro, Iloilo City.
Sa interview sang Bombo Radyo kay Police Liutenant Marlon Ayson, Assistant Officer sang CIDG- IPFU, iya ginpahayag nga nagahilibion ang babayi kag nagapakitluoy nga buligan siya sang CIDG bangud ginapahog ini nga ipalapta kag i-post sa social media ang iya hublas nga mga litrato (nude photos) kag video kung bulagan niya ang lalaki kag kung indi maghatag sang P20,000.
Suno kay Ayson, kaso nga paglapas sa Republic Act 9995 ukon Anti-Photo and Video Voyeurism Act of 2009 kag Article 286 ukon Grave Coercion of Revised Penal Code ang ipaga-file nga kaso diri kay Alyas Jan.
