ILOILO CITY- Mataas nga talakladon para sa gobyerno sang Pilipinas nga makuha ang pagsalig sang mga pumuluyo sa COVID-19 vaccine.
Sa interview sang Bombo Radyo kay Senate Minority Leader Franklin Drilon, iya ginpahayag nga apisar nag-abot na ang una nga batch sang Sinovac vaccine sang China, manubo sa gihapon ang kumpiyansa sang mga tawo sa bakuna kag nagamalibad sa pagpabakuna.
Suno kay Drilon, konsekwensya ini sang pabag-o-bag-o man nga pahayag sang mga matag-as nga opisyal sang gobyerno tuhoy sa ila pagpabakuna.
Ginpahayag sang opposition senator nga nangin dako man nga factor sa pagkadula sang salig sang publiko sa bakuna amo ang mishandling sang dengvaxia controversy nga napun-an pa sang drama ni Public Attorney’s Office Chief Atty. Persida Rueda Acosta.
Dugang pa sang Ilonggo nga senador, ang mga problema sa subong ang konsekwensya na sang isa ka tuig nga pagpabaya sang gobyerno sa pag-uyat sa krisis nga dala sang pandemya.
May kaangtanan naman sa ginproponer sang gobyerno nga pagpadala sang nurse abroad kabaylo sang donasyon nga (COVID-19) vaccine, ginpahayag ni Drilon nga indi commodity ang mga Filipino nurses gani wala nagakaangay nga usaron sila agud i-barter sa bakuna.
Sa isyu naman natuhoy sa paghatag sang gobyerno sang blanket immunity sa mga vaccine manufacturers agud nga wala sila sang salabton sa tion nga may maeksperyensiyahan nga adverse side effects ang indibidwal nga nakabaton sang bakuna, ginpahayag ni Drilon nga nagalapas ini sa laye kag sa public policy.
Paathag sang senador, sa idalom sang Covid-19 Vaccination Program Act nga ginpasar sang kongreso sang nagligad nga semana, apisar may yara sang immunity ang Covid-19 vaccine manufacturers gikan sa mga kaso para sa mga claims angot sa pag-administer sang Covid-19 vaccine apang wala naman sila sang immunity para sa willful misconduct ukon gross negligence.
