Ginpakamalaot sang National Union of Students of the Philippines (NUSP) Panay ang ginatawag nila nga red-tagging batok sa ila organisasyon nga nagluntad sa isa ka NSTP session sa Central Philippine University.
Ini matapos ginpalapta sang isa ka babayi halin sa CPU nga ang organisasyon kaangay sang Anakbayan, National Union of Students of the Philippines kag Kabataan Partylist, pati ang iban pa nga grupo ang mga produkto sang New People’s Army.
Sa interview sang Bombo Radyo kay Matt Gonzaga, coordinator sang National Union of Students of the Philippines (NUSP) Panay, iya ginpahayag nga legitimate organizations kag sources ang ila grupo kag indi parte sang ano man nga rebelde nga grupo.
Suno pa kay Gonzaga, nag-reach out na sa ila ang Commission on Human Rights may kaangtanan sa nasambit nga insidente, kag sa subong ginaproseso na nila ang validated complaint agud ma-imbestigahan ini.
Gin-athag man sini nga ginahatagan gid nila sang importansya ang freedom to associate, ukon ang kahilwayan sang mga indibidwal nga mag-upod ukon mag-organisar sang ila kaugalingon nga mga grupo nga magabulig sa komunidad.
Dugang pa ni Gonzaga, ginakabig nila nga maka-alarma ang nagakatabo nga ini sa sulod mismo sang eskwelahan kag indi dapat pagkabigon nga isa lamang ka normal nga buluhaton sang isa ka organisasyon.
