Wala nagapakampante ang Pinoy pole vaulter nga si EJ Obiena apisar nakabalik ini sa porma kag nabulsa ang gold medal sa tournament sa Poland.
Tubtub sa Marso 9 ang qualifying period para sa World Indoor Championships sa Nanjing, China gani ginalagas sang Pinoy Olympian ang tiyempo.
Kinahanglan sini lapawan ang qualifying mark nga 5.85 meters, kag pananglitan maglampas na sa amo nga petsa kag indi pa niya ini mahimo, indi sigurado ang 29-anyos nga pole vaulter kun may tyansa pa siya nga makasulod.
Naubos ang tatlo sini ka attempts sa 5.85-meters sa Poland apang wala ini nagmadinalag-on.
Nahibaluan nga sang Septyembre 1, 2024 pa nag-umpisa sang qualification period sa World Indoor Championships, apang nakaangkon si Obiena sang spine injury sang amo nga tion, kag nakabalik lamang sa kumpetisyon sang Enero subong na nga tuig.
Sa ORLEN Copernicus Cup sa Torun, Poland kahapon, nagpangibabaw si EJ matapos nakalukso sang 5.80-meters nga amo man ang iya best performance subong nga season.
Nagbawi ini matapos napaslawan nga madepensahan ang iya titulo kag nagpang-pito lamang sa ISTAF Indoor Dusseldorf sa Germany kag nagpang-siyam sa Meeting Hauts-de-France Pas-de-Calais Tropee sa France.
Pangaduha naman niya ini nga gold medal subong nga 2025 kag pangatlo nga podium finish matapos nagpanguna sa Meeting Metz Moselle Athlelor sa France kag nagpangaduha sa International Springer-Meeting Cottbus sa Germany.
