Nagsaka na sa ikaduha nga pwesto sa world ranking sa men’s pole vault ang Filipino pole vaulter nga si EJ Obiena.
Base sa pinakaulihi nga rankings, halin sa pang-numero tres, nagtaas si Obiena sa 1,432 points kag naunahan si Christopher Nielsen sang United States nga yara anay sa ikaduha nga spot sa sulod sang 98 ka semana.
Nagapang-tatlo na subong si Nielsen nga may total score nga 1,428. Nagapabilin naman nga world number 1 si Armand Duplantis sang Sweden nga may 1,569 points.
“Your very own skinny kid from Tondo, alumni of CKSC and UST, is now WORLD NUMBER TWO,” kabahin sang anunsyo sang 25-anyos nga Pinoy athlete. “Thank you to everyone who made this possible, and my deepest gratitude to those who went to war so that I could continue this dream. This is not just my accomplishment alone, but everyone’s.”
Nahibaluan nga sulod na si Obiena sa 2024 Paris Olympics matapos na-clear ang 5.82-meter qualifying mark sa Wanda Diamond League’s Bauhaus Galan meet sa Sweden sang nagligad nga Hulyo 3.
Sang Hunyo, matandaan nga si Obiena ang una nga Asian nga nakasulod sa “six-meter club” matapos nagdaog sang bulawan nga medalya sa Bergen Jump Challenge sa Norway — tion nga iya man nga na-reset ang Asian kag national pole vault records.
Preska pa si Obiena halin sa gold medal finish sa 2023 Asian Athletics Championships sa Bangkok, Thailand sang nagligad lang nga adlaw. Wala ini sang pahuway bangud liwat ini nga makit-an sa Hulyo 21 sa Meeting Herculis EBS– ang Monaco leg sang Diamond League. Yara man sa amo nga kumpetisyon sanday Duplantis kag Nielsen.
Sa Agusto, indi man pagpalampason ni Obiena ang pagpasakop kag pagdaog sa World Athletics Championship sa Budapest, Hungary. #
