Napaslawan nga makadala-pauli sang medalya ang Pinoy pole vaulter nga si EJ Obiena sa ikaduha nga tournament nga ginpasakupan sini kasunod sang Paris Olympics.
Sa Silesia leg sang Wanda Diamond League, nagpang-lima si Obiena matapos na-clear sa una nga mga attempt ang 5.62 kag 5.82 meters, apang tatlo ka beses nga wala nakakuha sang clearance sa masunod nga height nga 5.92 meters.
Antes sini nga kumpetisyon, isa ang 28-anyos nga pole vault star sa tatlo ka mga atleta nga nakabulsa sang bronze medal sa Lausanne leg sang amo man nga tournament sang nagligad nga semana kasunod kanday Armand ‘Mondo’ Duplantis sang Sweden kag Sam Kendricks sang USA.
Sa Silesia leg naman sa Poland, naghari gihapon ang reigning Olympic gold medalist kag world number 1 nga si Duplantis kag nag-set pa sang bag-o nga world record nga 6.26-meters, lapaw pa sa 6.25 meters sini nga na-set sa Paris Olympics duha ka semana na ang nagligad.
Antes sini nga clearance, tag-isa ka bes lang nga na-clear sang 24-anyos nga pambato sang Sweden ang 5.62m, 5.92m, kag 6.00m samtang duha ka beses naman sini nga ginlukso ang 6.26m antes napagkit ang bag-o ang world record.
Ang Paris Olympics silver kag bronze medalists nga sanday Kendricks kag Emmanouil Karalis sang Greece ang nagpangaduha kag nagpangatlo sa kumpetisyon nga pareho naka-clear sang 6.00 meters.
